Drafti për përzgjedhjen e strukturave të administrimit të zgjedhjeve

0

Kodi i ri zgjedhor i dakordësuar mes partive kryesore të vendit, do të shkrijë përfundimisht Komisionin Qendror të Zgjedhjeve (KQZ) duke rimodeluar administrimin e procesit me “Komisioner Shtetëror të Zgjedhjeve”, “Komision Rregullator” dhe “Komision të Ankimeve dhe Sanksioneve (KAS).

Nga projektligji i bërë publik të premten bie në sy formula me të cilën do të zgjidhen komisioneri, nënkomisioneri dhe anëtarët e KAS-it.

Sipas draftit të ndërmjetësuar mes partive kryesore, zgjedhja e Komisionerit do të bëhet përmes një komisioni të posaçëm parlamentar ku opozita do të ketë një të dërguar si përfaqësues me të drejtë skualifikimi të një prej 3 kandidatëve që do të listojë komisioni.

“Dy kandidaturat e tjera i paraqiten për votim Kuvendit,” – thuhet në projektligj.

Kandidaturat për nënkomisionerin përzgjidhen nga përfaqësuesi i opozitës, komisioni parlamentar ka të drejtë të skualifikojë një prej 3 kandidatëve dhe më pas “dy kandidaturat e tjera do t’i paraqiten Kuvendit për votim”.

Për Komisionin Rregullator dhe KAS-in, të cilët do të kenë nga 5 anëtarë përzgjedhja e emrave do të bëhet me listë të përbashkët ku dy prej tyre do të mund t’i propozojë përfaqësuesi i opozitës dhe 3 të tjerët komisioni parlamentar.

Komisioneri, anëtarët e Rregullatorit dhe anëtarët e KAS-it zgjidhen me jo më pak se 84 vota në parlament.

Për sa i përket mandateve, komisioneri do të ketë mandat 7-vjeçar, nënkomisioneri 4-vjeçar, anëtarët e Rregullatorit mandat 5-vjeçar, ndërsa KAS-i mandat 9-vjeçar.

Në projektligj bie në sy fakti që KQZ-së i jepet e drejta të refuzojë listat e partive nëse nuk kanë respektuar kuotat gjinore me të paktën 30 për qind kandidatura vajza, ndërsa qeverisë i ndalohet të marrë vendime favorizuese 4 muaj para zgjedhjeve dhe aktivitetet e saj do të kërkojnë leje nga KQZ-ja.

Me reformën e re zgjedhore, zgjedhjet do të mund të mbahen vetëm në periudhat 15 prill-15 maj, ose 15 tetor-15 nëntor.

Ndryshimet e kodit zgjedhor u bënë pas rreth 6 muajsh debatesh mes palëve politike, ku me ndërhyrjen e ndërkombëtarëve, opozita jashtëparlamentare detyroi ngritjen e një tryeze jashtë Kuvendit për të ndërmjetësuar një reformë konensuale.

Projektligji i ndërmjetësuar pritet të kalojë në parlament, ku javët e fundit ka pasur deklarata të zellshme prej opozitës parlamentare se nuk do ta miratojë atë nëse nuk shoqërohet me shtesa për ndryshim të sistemit zgjedhor.

Comments

comments

Share.

About Author

Avatar

Leave A Reply

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.